İyulun 5-də Bakıda səfərdə olan İranın xarici işlər naziri Hüseyn Əmir Abdullahiyan Azərbaycan səfirliyinə qarşı törədilmiş terror aktının İranın məhkəmə və hüquq-mühafizə orqanları tərəfindən çox ciddi şəkildə araşdırıldığını bildirdi və Azərbaycanın Tehrandakı səfirliyinin fəaliyyətinin tezliklə bərpa olunacağına ümidvarlığını ifadə etdi.

Son illər İran-Azərbaycan münasibətləri gərgindir. Münasibətlərin xüsusi gərgin fazası bu ilin yanvarın 27-də Azərbaycanın Tehrandakı səfirliyinə hücumundan sonra başlayıb.

Ekspertlər hesab edir ki, İran-Azərbaycan münasibətlərinin normallaşmasının bir neçə şərtləri var.

Milli Məclisin Müdafiə, təhlükəsizlik və korrupsiyaya qarşı mübarizə komitəsinin sədr müavini Hikmət Babaoğlu Turana bildirib ki, İranın xarici işlər naziri Azərbaycanın səfirliyinə hücum edən şəxsin cəzalandırılmasından qəti danışmadı: “O öz tvitter hesabında bildirdi ki, əgər belə bir şey varsa, tapılacaq. Yəni qeyri-dəqiq və şərti cümlələri qurdu. Ona görə də Azərbaycana gəlməmişdən əvvəl onun tvitterdə yazdığı fikirlər riyakarlıqdan başqa bir şey deyil. Çünki görüş zamanı o Azərbaycan Prezidentindən xahiş etdi ki, Azərbaycanın Tehrandakı səfirliyi işini bərpa etsin, Azərbaycan Prezidenti isə dedi ki, biz terrorçuların cəzalandırılacağına ümid edirik. Ancaq İranın xarici işlər naziri həmin terrorçuların cəzalandırılması barədə heç nə deməyib”.

Deputat qeyd edib ki, başqa bir tərəfdən Azərbaycana gəlməmişdən bir neçə gün qabaq Şimal-Cənub dəhlizinin Azərbaycan üzərindən deyil, Türkmənistan və Xorasan üzərindən çəkilməsi barədə müzakirələr aparılıb: “Belə olan halda biz İranın riyakar siyasətini 30 ildir tanıyırıq, bu gün də bu siyasət davam edir. Hesab efirəm ki, İranın xarici işlər naziri öz sözlərində səmimi deyildi”.

Siyasi Menecment İnstitutunun rəhbəri Azər Qasımlı isə AzadlıqRadiosuna bildirib ki, münasibətlərin yaxşı olması həm Azərbaycana, həm İrana lazımdır: “İran istəmir ki, bu bölgədə İsrail güclü olsun, Azərbaycanda İsrailin güc potensialı olsun. Həmçinin İran sanksiyalar altındadır, ciddi iqtisadi problemləri var. Bu baxımından İran əlavə başağrısı və regionda əlavə düşmənin olmasını istəmir”.

Buna da bax:

İran Azərbaycan səfirliyinə hücumla bağlı bəyanat yayıb

Ekspertin fikrincə, Azərbaycanla İran arasında bir neçə problem var: “Biri Zəngəzur projesidir. İlham Əliyevin Zəngəzur ritorikası, keçən ilin sentyabrında Ermənistan-Azərbaycan sərhədində atəşkəsin pozulması İranı narahat edir. İranın istəyi odur ki, onunla Ermənistan arasında olan sərhəd dəyişməsin və orada hər hansı bir dəhliz olmasın. İkinci məqam isə İsraillə Azərbaycanın arasında ilk növbədə hərbi sahədə münasibətlərin daha da dərinləşməsidir. Bu, İran üçün narahatedici faktordur”.

Onun fikrincə, Azərbaycan üçün isə narahatedici faktor o idi ki, İranın birbaşa Qarabağ erməniləri ilə bir kommunikasiyası var idi, İrandan Ermənistan vasitəsilə Qarabağa silah göndərilirdi:

“İndi bunun qarşısı alındı, Laçında nəzarət-buraxılış məntəqəsi quruldu. Azərbaycanın digər istəyi də odur ki, İran Zəngəzur dəhliz ( Ermənistanın Sünük bölgəsindən keçəcəyi gözlənən ) məsələsinə müdaxilə və Ermənistana bu mənada təzyiq etməsin. Digər problem İranın Azərbaycanda dini şəbəkəsinin qurmasıdır. Azərbaycanın istəyi odur ki, İran bu şəbəkələri yaratmasın, dini ekspansiyadan əl çəksin”.

A.Qasımlının sözlərinə görə, kəskin ritorikasına baxmayaraq, Azərbaycan İranla münasibətlərini heç vaxt tam kəsməyib. “İran tərəfi də bunu gözəl başa düşür. Azərbaycan elitasının və İran rejimin maraqları bir çox məqamlarda üst-üstə düşür və iki ölkə arasında ciddi gərginliyin olmasını zənn etmirəm”.

Yazida səslənən tənqidi fikirlərə, İranın Azərbaycandakı Səfirliyindən münasibət almaq mümkün olmayıb.

Xatırlatma

Yanvarın 27-dəAzərbaycanın Tehrandakı səfirliyinə silahlı hücum olub. Hücum edən şəxs səfirlik əməkdaşlara atəş açıb. Hücum nəticəsində diplomatik nümayəndəliyin mühafizə xidmətinin rəhbəri Orxan Əsgərov həlak olub, iki mühafizəçi isə yaralanıb. Daha sonra Azərbaycan səfirliyinin əməkdaşları Tehrandan evakuasiya edilib, səfirliyin fəaliyyəti dayandırılıb.

Azərbaycan bu hücumu "terror aktı" adlandırıb. XİN isə vətəndaşları İrana səfərdən çəkinməyə çağırıb. İran səfirliyə silahlı hücumun araşdırılacağını bəyan edib.

Buna da bax:

Fərid Səfərli casus olmadığını deyir

Buna da bax:

İran Azərbaycan səfirliyinə hücumla bağlı bəyanat yayıb

İran və "Avropa üçlüyü" (Fransa, Böyük Britaniya, Almaniya) Cenevrədəki nüvə danışıqlarında görüşləri davam etdirmək barədə razılığa gəlib. Bu barədə Avropa diplomatiyasının rəhbəri Kaya Kallas bildirib.

"Danışıqları davam etdirmək barədə razılığa gəldik, danışıqlar prosesini açıq saxlamaq çox vacibdir", - Kallas danışıqlardan sonra deyib. Onun sözlərinə görə, təkcə nüvə mövzusu deyil, həm də "bizdə olan daha geniş suallar" müzakirə olunacaq.

Fransanın xarici işlər naziri Jan-Noel Barro deyib ki, İranın xarici işlər naziri Abbas Ərağçi bütün, o cümlədən əvvəllər müzakirə olunmayan məsələləri masaya qoymağa razılıq verib və "bu gün başladığımız söhbəti davam etdirməyə... hazır olduğunu göstərib".

Barronun sözlərinə görə, İranın nüvə problemini hərbi yolla həll etmək mümkün deyil. "Hərbi əməliyyatlar onu təxirə sala bilər, lakin tamamilə aradan qaldıra bilməz", - o, görüşdən sonra britaniyalı və almaniyalı həmkarları ilə birgə çıxışında bildirib.

Böyük Britaniyanın xarici işlər naziri Devid Lemmi Tehranı ABŞ ilə danışıqları da davam etdirməyə çağırıb. "Biz açıq şəkildə bildirdik: İranın nüvə silahı ola bilməz", - Britaniya XİN rəhbəri vurğulayıb.

Avropa və Birləşmiş Ştatların məqsədi İranın uranın zənginləşdirilməsini dayandırmasını təmin etməkdir, lakin "İranın enerji ehtiyacları ilə bağlı müzakirələr" məqbuldur, - Lemmi əlavə edib.

A.Ərağçi də danışıqlar bitdikdən sonra jurnalistlərə açıqlama verib. O, "Avropa üçlüyü" və Aİ ilə görüşlərin davam etdirilməsini dəstəkləyib və Tehranın yaxın gələcəkdə danışıqların yeni raundunda iştiraka hazır olduğunu deyib.

Nazir İsrailin İranın nüvə obyektlərinə hücumlarını pisləyib və Avropa ölkələrinin eyni mövqeyi açıq şəkildə ifadə etməməsindən "ciddi" narahatlığını bildirib.

Avropa nazirləri ilə İranın xarici işlər naziri A.Ərağçi arasında İranın nüvə proqramı üzrə danışıqlar iyunun 20-də Cenevrədə baş tutub. Görüş üç saatdan çox davam edib.

Ermənistan baş naziri və Türkiyə prezidenti İstanbulda görüş zamanı iki qonşu ölkə arasında münasibətlərin normallaşması prosesini müzakirə ediblər. Nikol Paşinyan və Rəcəb Tayyib Ərdoğan konstruktiv dialoqun davam etdirilməsinin və konkret nəticələrin əldə olunmasının vacibliyini vurğulayıblar, - Ermənistan hökumətinin məlumatında deyilir.

Baş nazir Paşinyan Ermənistanın regionda sülh və sabitliyin bərqərar olması prosesinə sadiqliyini vurğulayaraq, qonşular ilə münasibətlərin normallaşdırılması siyasətinin davam etdirilməsi öhdəliyini bir daha təsdiqləyib.

İki ölkənin liderləri birbaşa təmasları və dialoqu davam etdirməyə hazır olduqlarını bildiriblər.

"Ermənistan və Azərbaycan arasında sülh prosesi, eləcə də Ermənistan hökumətinin "Sülh yolayrıcı" layihəsi ətrafında fikir mübadiləsi aparılıb", - Ermənistan baş nazirinin mətbuat xidməti xəbər verir.

Türkiyə Prezidenti Administrasiyasının məlumatına görə isə, görüşdə Bakı ilə Yerevan arasında sülh danışıqları zamanı əldə olunan razılaşmalara xüsusi diqqət yetirilib. Ərdoğan deyib ki, Ankara regionun qarşılıqlı fayda prinsipləri əsasında inkişafına yönəlmiş təşəbbüsləri dəstəkləməyə davam edəcək.

Ərdoğan İsrailin İrana zərbələri ilə bağlı təhdidlərə işarə edərək gərginliyin azaldılması üçün səylərin vacibliyini vurğulayıb. O, vəziyyətin daha da gərginləşməsinin qarşısını almaq məqsədilə bölgə liderləri ilə sıx təmasları davam etdirdiyini bildirib.

N.Paşinyan iyunun 20-də Türkiyəyə işgüzar səfərə gedib. Ermənistan liderləri daha əvvəl də müxtəlif səbəblərlə Türkiyəyə səfərlər ediblər. Amma N.Paşinyanın bu səfəri fərqlənir, o, nə rəsmi, nə də qeyri-rəsmi tədbirlərlə (məsələn, andiçmə və ya futbol oyunu) bağlı deyil. N.Paşinyanın Türkiyəyə səfərini onun partiyadaşları "tarixi" adlandırıblar.

5 iyun

"Türkiyə ilə münasibətlərimiz fəal və səmərəlidir"

Ermənistanın xarici işlər naziri Ararat Mirzoyan iyunun 5-də parlament komitəsində büdcə hesabatının müzakirəsi zamanı bildirib ki, Türkiyə ilə diplomatik münasibətlərin olmamasına baxmayaraq, iki ölkə arasında çox fəal və effektiv dialoq qurulub.

"Türkiyə ilə rəsmi diplomatik əlaqələrimiz olmasa da, diplomatik əlaqələr olan bir çox digər ölkələrlə müqayisədə bizim daha fəal və səmərəli dialoqumuz var. Təbii ki, kim desə ki, artıq bu dialoqun sahədə real nəticələr verməsinin vaxtıdır, haqlıdır", - Mirzoyan vurğulayıb.

Ankara on illərdir Türkiyə-Ermənistan sərhədinin açılmasını, Yerevanla diplomatik əlaqələrin qurulmasını Ermənistan-Azərbaycan münaqişəsinin Bakı üçün məqbul həlli ilə şərtləndirir. 2022-ci ilin əvvəlində Ermənistan hökuməti ilə normallaşma danışıqları başlayandan Türkiyə liderləri bu şərti səsləndirib.

Bu gün, iyunun 20-də Xətai rayon Məhkəməsində fəaliyyəti dayandırılan Gənc Qazilər Birliyinin sədri olmuş Hacı Vəliyev barəsində həbs-qətimkan tədbirinin müddətinin uzadılması ilə bağlı istintaq orqanının vəsatətinə baxılıb.

Məhkəmədə təqdimat təmin olunub, H.Vəliyev barəsində seçilmiş həbs-qətimkan tədbirinin müddəti 2 ay uzadılıb.

Bu barədə müdafiə tərəfi bildirib.

O, Cinayət Məcəlləsinin 221.3-cü (Silahdan və ya silah qismində istifadə olunan əşyalardan istifadə edilməklə xuliqanlıq...) və 186.1-ci (Özgənin əmlakını qəsdən məhv etmə və ya zədələmə - zərərçəkmiş şəxsə xeyli miqdarda ziyan vurmaqla törədildikdə) maddələri ilə ittiham olunur.

H.Vəliyev bu il aprelin 1-də həbs edilib. İttihami qəbul etmir. Onun həbsindən sonra "Gənc Qazilər" İctimai Birliyinin fəaliyyətini dayandırdığı açıqlanıb. Bu barədə həmin qurum adından yayılan məlumatda qeyd olunub ki, yarandığı gündən müharibədə sağlamlığını itirən insanların sosial müdafiəsinin gücləndirilməsi, cəmiyyətə inteqrasiyası və vətənpərvərlik dəyərlərinin təbliği istiqamətində fəaliyyət göstərib: "Lakin son dövrlər yaranmış bir sıra obyektiv, subyektiv səbəblər, o cümlədən təşkilati fəaliyyətin davamlığında çətinliklər, üzvlər arasında əlaqələrin zəifləməsi və ictimai gözləntilərlə uzlaşmayan durumlar nəzərə alınaraq, təşkilatın fəaliyyəti ilə bağlı geniş müzakirələr aparılıb. Yekun nəticə olaraq, birliyin fəaliyyətinin bu mərhələdə dayandırılmasının daha məqsədəuyğun olduğu qənaətinə gəlmişik".

H.Vəliyev sosial şəbəkələrdə tənqid çıxışları ilə də tanınırdı. Onun bundan əvvəl də saxlanıb sərbəst buraxıldığı bildirilmişdi. O, xüsusilə İkinci Qarabağ müharibəsindən sonrakı dövrdə döyüşlərdə sağlamlığını itirmiş hərbçilərin və ya həlak olanların ailələrinin problemlərini ictimailəşdirib.

Gənc Qazilər Birliyi 2021-ci ildə "Qarabağ Qaziləri" İB-nin əsasında yaradılmışdı.

Bu gün, iyunun 20-də Qax rayon İcra Hakimiyyətində əməliyyat keçirildiyi bildirilir.

Azərbaycanın yerli saytlarının məlumatına görə, əməliyyatı Dövlət Təhlükəsizliyi Xidməti (DTX) keçirib.

İlkin məlumatda rayon icra başçısı Musa Şəkiliyev və müavinlərinin saxlandığı iddia edilir. Vurğulandığına görə, onlarla bağlı vəzifə səlahiyyətlərindən sui-istifadə etməklə mənimsəmə və digər əməllər üzrə araşdırmalar gedir.

Hələlik, bu məlumata DTX-dən, Qax rayon İcra Hakimiyyəti və başqa maraqlı tərəflərdən münasibət almaq mümkün olmayıb.

M.Şəkiliyev bu vəzifəyə 2010-cu ildə təyin olunub.

Xatırlatma

Bundan əvvəlki illərdə Azərbaycanda bir çox icra başçıları ardıcıl şəkildə həbs ediliblər. Ölkədə icra başçılarının həbs dalğası 2019-cu ilin dekabrında başlayıb. Həmin vaxt Yevlax və Ağstafa rayonlarında DTX əməliyyatlar keçirmişdi. Ardınca bu proses Neftçala, Biləsuvar, İmişli, Kürdəmir, Cəlilabad və Şəmkir rayonlarında davam edib. Onlar mənimsəmə və başqa ittihamlarla müxtəlif müddətə həbs cəzası alıblar. Məhkəmə prosesində bəziləri ittihamları qismən qəbul etsə də, çoxu onları, əsasən, yalanlayıblar.

Onlardan Ağstafa rayon İcra Hakimiyyətinin keçmiş başçısı Nizaməddin Quliyev hökmdən (9 il) az sonra koronavirusa yoluxub və 2021-ci il sentyabrın 5-də ölüb. Yevlax şəhər İcra Hakimiyyətinin sabiq başçısı Qoca Səmədov isə (7 il 3 ay) 2023-cü ilin dekabrında – vaxtından əvvəl şərti azadlığa buraxılandan beş ay sonra vəfat edib.

Yaponiya Gürcüstan hökumətindən Yaponiya vətəndaşlarının bu ölkə ərazisində lisenziyası olan onlayn kazinolara çıxışını məhdudlaşdırmağı xahiş edib. Bu, Tokionun qeyri-qanuni onlayn qumarla mübarizə kampaniyasının bir hissəsidir.

Gürcüstan hökuməti məsələ ilə bağlı, hələlik, mövqeyini bildirməyib.

"Kyodo" agentliyinin hökumətdəki mənbəyə istinadən verdiyi xəbərə görə, analoji sorğular daha 7 ölkə və əraziyə göndərilib. Bunlar Kanada, Kosta-Rika, Malta, Anjuan adası (Komor adaları), Kyurasao (Niderland krallığının tərkibində), eləcə də Böyük Britaniyanın dənizaşırı əraziləri olan Cəbəllütariq və Men adasıdır.

Yaponiyada xarici saytlarda qumar oyunlarında iştirak qanunsuz sayılsa da, hökumət səlahiyyətliləri bildirir ki, təkcə 2024-cü ildə Yaponiya vətəndaşları beynəlxalq idman mərc oyunlarına təxminən 6.45 trilyon yen (45 milyard ABŞ dolları) xərcləyiblər ki, bu da ölkədaxili onlayn platformalardakı mərclərin həcmini beş dəfə üstələyir.

Məşhurların və peşəkar idmançıların onlayn kazinolarda oynaması ilə bağlı xəbərlərin cəmiyyətdə geniş rezonansa səbəb olduğu bir vaxtda Yaponiya parlamentinin aşağı palatası iyunda qanunsuz onlayn qumarla mübarizə qaydalarını sərtləşdirən qanun layihəsini təsdiqləyib.

Yaponiyada lotereyalar, at yarışları, motosiklet yarışları və qayıq yarışlarına edilən mərclər istisna olmaqla, onlayn qumarın, demək olar ki, bütün formaları qadağandır. Yapon istifadəçilər üçün əlçatan olan 40 məşhur onlayn kazinonun təhlili göstərib ki, onların hamısı xaricdə lisenziyalaşdırılıb və 70 faizi Kyurasaoda qeydiyyatdan keçib.

Argentina Milli Kəşfiyyat Xidməti (SIDE) ictimai rəyin manipulyasiyası və dezinformasiyanın yayılması ilə məşğul olan şəbəkənin beş rusiyalı üzvünü aşkar edib. Bu barədə Argentina prezidentinin mətbuat katibi Manuel Adorni mətbuat konfransında bildirib.

Rusiyalılar, o cümlədən Lev Andriaşvili və onun həyat yoldaşı İrina Yakovenko "Kompaniya" adlı təşkilatla əlaqələndirilir. Bu təşkilat "Laxta" layihəsi ilə bağlıdır və daha çox Olqinodakı "troll fabriki" kimi tanınır. Layihənin rəhbəri 2023-cü ildə həlak olmuş "Vaqner" özəl muzdlu hərbi şirkətinin (ÇVK) rəhbəri Yevgeni Priqojindir.

Argentina hökumət rəsmisinin məlumatına görə, Andriaşvili və Yakovenko (Rusiyadan) maliyyənin alınması və ölkə vətəndaşları ilə əlaqələrin qurulmasına məsul olublar.

"'Kompaniya"nın məqsədi Rusiya maraqlarına loyallıq göstərən şəxslər qrupunu formalaşdırmaq, dezinformasiya kampaniyaları aparmaq, həssas siyasi məlumatlar əldə etmək və fondlar, QHT-lər və vətəndaş cəmiyyətinə təsir göstərməkdir", - Adorninin sözlərini "La Derecha Diario" nəşri sitat gətirib.

O bildirib ki, hökumət Argentinanın heç bir digər ölkənin təsiri altına düşməsinə imkan verməyəcək. Adorni rusiyalıların saxlanılıb-saxlanılmadığı və ya barələrində cinayət işinin açılıb-açılmadığına dair məlumat verməyib.

Daha əvvəl də Braziliyanın xüsusi xidmət orqanları doqquz Rusiya agentindən ibarət şəbəkəni ifşa edib. "The New York Times" məlumatına görə, onlar bu ölkədə casusluq etməyiblər, yeni bioqrafiya yaratmaq üçün ora göndəriliblər. Onların heç biri Braziliyada saxlanılmayıb, hamısı başqa ölkələrə çıxmağı bacarıb və, ehtimal ki, Rusiyaya qayıdıblar.

Azərbaycanın çimərliklərində monitorinq aparılıb, onların bəzilərində normadan artıq bakterioloji çirklənmə aşkarlanıb.

Bu barədə iyunun 19-da Səhiyyə Nazirliyi məlumat yayıb.

Məlumatda bildirilir ki, yay mövsümünə hazırlıq çərçivəsində Gigiyena və Epidemiologiya Mərkəzi Bakı, Sumqayıt, Mingəçevir şəhərləri, habelə Lənkəran, Astara və Xaçmaz rayonlarında yerləşən çimərliklərdə monitorinqlər aparıb: "Suraxanı rayonunun Hövsan, Xəzər rayonunun Türkan, Səbail rayonunun Şıx, Qaradağ rayonunun Sahil, Xaçmaz rayonunun Niyazoba kəndi, Lənkəran rayonunun Aşağı Nüvədi qəsəbəsi və Sütəmurdov kəndində yerləşən çimərliklərdən götürülən su nümunələrində normadan artıq bakterioloji çirklənmə aşkarlanıb. Bu ərazilərdə suyun çirklənmə səviyyəsinin əhalinin sağlamlığı üçün təhlükə yaratdığı və yoluxucu xəstəliklərin yayılmasına səbəb ola biləcəyi bildirilib. Bu səbəbdən qeyd olunan çimərliklərdə istirahət etmək tövsiyə olunmur".

Azərbaycanda iyunun 15-dən çimərlik mövsümü başlayıb.

Ölkədə hər il yay mövsümü ərəfəsində belə monitorinqlər aparılır. Bir sıra ekoloqların fikrincə, çimərliklərdə problemlərin aradan qaldırılması üçün hökumət səviyyəsində bir elə də səmərəli addımlar atılmır.

Rusiya prezidenti Vladimir Putin Ukrayna ilə müharibəsində həll yolu tapmağa və Ukrayna lideri ilə potensial görüşə hazır olduğunu bildirib. Rusiyanın iki gün əvvəl Kiyevə endirdiyi dron və raket zərbələri nəticəsində isə ölənlərin sayı 28-ə çatıb.

Putin iyunun 18-də Sankt-Peterburqda televiziyada yayımlanan brifinqdə xarici mediaya deyib: "Biz nəinki mövcud münaqişəyə son qoyacaq, həm də uzunmüddətli perspektivdə oxşar vəziyyətin təkrarlanmasının qarşısını almağa şərait yaradacaq bir həll yolu tapmalıyıq".

Putin bildirib ki, danışıqlar iyunun 22-dən sonra bərpa oluna bilər. Daha əvvəl o, bu tarixdə əsirlərin mübadiləsi və həlak olan əsgərlərin meyitlərinin repatriyasiyasını təklif edib.

Lakin Rusiya lideri əlavə edib ki, o, Ukrayna prezidenti Volodimir Zelenski ilə yalnız istənilən sülh danışıqlarının "son mərhələsində" görüşəcək.

"Mən hər kəslə, o cümlədən Zelenski ilə görüşməyə hazıram. Bu, problem deyil - əgər Ukrayna dövləti danışıqlar aparmaq üçün konkret birinə etibar edərsə, Allah xatirinə, bu Zelenski də ola bilər", - Putin bildirib.

"Mən onunla görüşməyə də hazıram – amma yalnız bu, bir növ yekun mərhələ olarsa", - o əlavə edib.

Putin 2022-ci ilin fevralında Ukraynaya qarşım genişmiqyaslı işğal müharibəsinə başladıqdan sonra NATO şərq cinahında qüvvələrini gücləndirərkən Qərb Rusiyaya qarşı sarsıdıcı sanksiyalar tətbiq edib.

Qərb liderləri isə Putini ABŞ prezidenti Donald Trampın irəli sürdüyü atəşkəs şərtlərinə razılıq vermədiyinə görə tənqid edirlər.

Azərbaycanda süni torpaq sahələrində kazino oyunlarının təşkilinə və keçirilməsinə icazə verilə bilər.

Azərbaycanın yerli saytlarının məlumatına görə, bununla bağlı Milli Məclisdə ölkə qanunvericiliyinə dəyişikliklər nəzərdə tutulur.

Dəyişikliklərə görə, oyunları yalnız nəzarət orqanının rəyi nəzərə alınmaqla lisenziya əsasında hüquqi şəxs təşkil edə biləcək.

27 il öncənin qadağasına yaşıl işıq

Azərbaycanda kazino oyunları 1998-ci ildə keçmiş prezident Heydər Əliyevin sərəncamı ilə qadağan olunub. Onunla bağlı keçmiş prezident "Azərbaycan Respublikasında iqtisadi cinayətkarlığa qarşı mübarizə sahəsində bəzi tədbirlər haqqında" Sərəncam imzalayıb. Sərəncamda qərar "Azərbaycan xalqının mənəviyyatına mənfi təsir göstərən,... hallara yol verməmək, iqtisadi sahədə cinayətkarlıqla mübarizənin möhkəmləndirildiyi və bazar münasibətlərinin bərqərar olduğu bir zamanda həmin sahədə müxtəlif əyintilərin qarşısını almaq məqsədi ilə" izah edilmişdi.

Embed paylaş

'Qarabağda kazino açılsın, turist gəlsin' - Deputat

Embed paylaş

Kod yaddaşa götürüldü

---

en px hündürlük px

---

The URL has been copied to your clipboard

No media source currently available

0:00 0:00:50 0:00

Amma son illər hakimiyyətə yaxınlığı ilə seçilən bir sıra iş adamları və deputatlar kazino oyunlarına icazə verilməsi ilə bağlı təkliflər səsləndirmişdilər. Onlar bunun ölkədə turizmin və iqtisadiyyatın inkişafına fayda verəcəyini düşünürdülər. İndi də Azərbaycan parlamentində təmsil edilən bəzi deputatların yerli mediaya bildirmələrinə görə, keçmiş dövrdə "effektiv nəzarət mexanizmlərinin olmaması, dünya təcrübəsinin öyrənilməməsi" bu cür fəaliyyət növlərinin Azərbaycan iqtisadiyyatına ziyan vurmasına, qeyri-qanuni yollarla əldə edilmiş pulların leqallaşdırılmasına və digər cinayətlərin törədilməsinə əlverişli şərait yaradırdı. Onların fikrincə, indi dövlət aparatının güclənməsi, nəzarət mexanizmlərinin oturuşması bu gün artıq 28 il öncəki real səbəbləri aradan qaldırmaq üçün kifayət qədər effektiv formada fəaliyyətə imkan verir.

Amma ayrı-ayrı müxalifət təmsilçiləri zaman-zaman açıqlamalarında kazinolara yenidən yaşıl işıq yandırılmasına mənfi münasibətlərini bildiriblər. Onların fikrincə, hakimiyyət belə hallara yol verməkdənsə, əhalinin sosial güzəranın yaxşılaşdırılmasına diqqət ayırmalıdır.

Gürcüstanın baş naziri İrakli Kobaxidze hakimiyyətin ATƏT-in Demokratik Təsisatlar və İnsan Haqları Bürosu (ATƏT/DTİHB) missiyasını yerli seçkiləri müşahidə etmək üçün dəvət etmək niyyətində olub-olmaması ilə bağlı medianın sualını cavablandırıb. Onun sözlərinə görə, "belə bir təcrübə mövcud deyil". İ.Kobaxidze ATƏT/DTİHB müşahidəçilərinin 2021-ci ildə keçirilən yerli seçkilərə dəvət olunmasını "istisna hal" adlandırıb və əlavə edib ki, o zaman "bu seçkilər bir növ parlament seçkiləri mövzusu ilə bağlı idi".

"Hesab edirik ki, bu halda ATƏT/DİHB-in bizim bələdiyyə seçkilərimizə əlavə yük olması artıqdır, bələdiyyə seçkiləri tamamilə normal şəkildə keçəcək. Bilirsiniz ki, ATƏT/DİHB parlament seçkilərini müşahidə edib və müvafiq nəticəni açıqlayıb, lakin bu nəticə heç kəsi maraqlandırmayıb. Bu gün isə həmin o şəxslər –ATƏT/DİHB-in nəticəsini tamamilə görməzlikdən gələnlər – bizdən ATƏT/DİHB-i dəvət etməyimizi istəyirlər", –Kobaxidze bildirib.

2014-cü ildə Gürcüstanda yerli seçkilər ATƏT/DTİHB-nin müşahidə missiyasının iştirakı olmadan keçirilib. Missiya 2006, 2017 və 2021-ci illərdə yerli seçkiləri müşahidə edib.

İyunun 18-də Böyük Britaniya səfirliyi Gürcüstan hökumətini ATƏT/DTİHB-nin seçki müşahidə missiyasını 2025-ci ilin oktyabrında keçiriləcək bələdiyyə seçkilərini müşahidəyə dəvət etməyə və DTİHB-nin 2024-cü il parlament seçkiləri ilə bağlı yekun hesabatında verdiyi tövsiyələri nəzərə almağa çağırıb.

Gürcüstanda yerli seçkilər 2025-ci il oktyabrın 4-nə təyin edilib.

Lənkəranın icra başçısı Taleh Qaraşova sui-qəsddə suçlanan Bəhruz Əsgərova 15 il həbs cəzası kəsilib. İyunun 17-də Bakı Ağır Cinayətlər Məhkəməsində ona hökm oxunub.

B.Əsgərov dövlətin konstitusiya quruluşunu dəyişməyə, qəsdən adam öldürməyə hazırlıq kimi əməllərdə suçlanır. Cinayət işinin materiallarında iddia edilir ki, o, Azərbaycanda terror aktları törətməyi planlaşdırıb və icra başçısının qətli də bu planın tərkib hissəsi olub.

Məhz T.Qaraşovun seçilməsinə gəlincə, iddiaya görə, B.Əsgərovun ayrıca nifrəti olduğundan onun ölümünü istəyib. Bu məqsədlə çevrəsindəki şəxslərlə danışaraq icra başçısını güddürüb, onun hərəkət marşrutunu və başqa bilgiləri dəqiqləşdirib.

İttihama əsasən, sui-qəsd planlanan digər şəxs cənub bölgəsində fərdi qaydada ingilis dili müəllimi kimi fəaliyyət göstərən Linn Terri olub.

B.Əsgərov və onunla əlbirlikdə suçlanan şəxsləri Dövlət Təhlükəsizliyi Xidmətinin (DTX) əməkdaşları saxlayıb. İstintaqın sonunda onun işi digərlərindən ayrılaraq məhkəməyə göndərilib və o, hakim önünə tək çıxarılıb.

B.Əsgərov özünü qismən təqsirli bildiyini söyləyib və əməlindən peşman olduğunu da dilə gətirib.

İcra başçısı T.Qaraşovla ingilis dili müəllimi L.Terri zərərçəkmiş qismində tanınıblar.

Buna da bax:

Həbsdəki icra başçısı ilə bağlı yarım milyonluq mənzil mübahisəsi

İsrail-İran münaqişəsindən dolayı Azərbaycanın İsraildəki və İrandakı səfirliklərinə, habelə Təbrizdəki baş konsulluğunda yaradılmış qaynar xətlərə gələn müraciətlərə gündəlik əsasda baxılır. AZƏRTAC-ın xəbərinə görə, bunu iyunun 17-də Azərbaycan Xarici İşlər Nazirliyinin (XİN) mətbuat katibi Ayxan Hacızadə bildirib. O deyib ki, İsraildəki Azərbaycan vətəndaşları qonşu Misir və İordaniyaya yönləndirilir.

A.Hacızadənin sözlərinə görə, indiyə qədər İrandakı səfirliyə və baş konsulluğa ümumilikdə 500-dək Azərbaycan vətəndaşının müraciəti daxil olub, onlardan 60 nəfərdən çoxu sərhədi keçib. 51 ölkədən 1200-dən artıq müraciətin hazırda nəzərdən keçirildiyi, onların sərhəddən keçidinə müvafiq icazələrin təmin olunduğu bildirilir.

"İsraildə olan 34 nəfər vətəndaşımızın İordaniyaya keçidi üçün müvafiq tədbirlər görülüb", - XİN rəsmisi vurğulayıb.

Azərbaycanın İrandakı səfirliyinin ailə üzvləri ölkələrinə keçiblər

Azərbaycanın İrandakı səfirliyi əməkdaşlarının ailə üzvləri də daxil olmaqla ilkin olaraq ümumilikdə 41 nəfər Azərbaycan vətəndaşının İran-Azərbaycan sərhədindən keçidi təmin olunub.

AZƏRTAC-ın məlumatına görə, bunu Xarici İşlər Nazirliyinin (XİN) mətbuat katibi Ayxan Hacızadə deyib. Onun sözlərinə görə, İrandakı səfirlik və Təbriz şəhərindəki Baş konsulluq, habelə İsraildəki səfirlik Azərbaycan vətəndaşlarının qaynar xəttlərə daxil olan müraciətlərini nəzərdən keçirərək zəruri tədbirlər görürlər. Amma A.Hacızadə indiyə kimi nə qədər Azərbaycan vətəndaşının müraciət etdiyini açıqlamayıb.

İran Azərbaycanla qonşu ölkədir. Koronavirus pandemiyası səbəb göstərilərək 2020-ci ilin yazında Azərbaycanın quru sərhədində qonşu ölkələrlə gediş-gəliş məhdudlaşdırılıb. 2023-cü il mayın 5-də Ümumdünya Səhiyyə Təşkilatı pandemiyanın başa çatdığını bəyan etsə də, sərhəddə məhdudiyyətlər götürülməyib. Nazirlər Kabineti məhdudiyyətlərin müddətinin uzadılmasını eyni səbəblə izah etsə də, rəsmilər çıxışlarında təhlükəsizlik amillərindən bəhs edirlər. Amma son günlər İranda yaranmış vəziyyətlə bağlı Azərbaycan dövləti xarici vətəndaşların təxliyələri üçün Astara sərhəd-keçid məntəqəsindən keçmələrinə şərait yaradır. Söhbət, əsasən, Rusiya vətəndaşlarından gedir.

İsrail iyunun 13-də İranın nüvə və hərbi obyektlərinə "qabaqlayıcı" zərbələr endirdiyini bildirib. Təl-Əviv xəbərdarlıq edib ki, hücumlar davam edəcək, məqsəd Tehranın nüvə silahı hazırlamasının qarşısını almaqdır.

Rəsmi Tehran da İsrailə cavab verməyə başlayıb. Artiq üç gündür tərəflər qarşılıqlı şəkildə bir-birlərinə zərbələr endirməkdədir. Hər iki tərəfdən itkilər var.

Kursk vilayətində bərpa işləri üçün Şimali Koreya Rusiyaya minatəmizləyənlər və inşaatçılar göndərəcək. Bu barədə Rusiya Təhlükəsizlik Şurasının katibi Sergey Şoyqu Pxenyanda Şimali Koreya lideri Kim Çen In ilə görüşdən sonra bildirib.

"Kim Çen In Rusiya ərazisindəki minaların təmizlənməsi üçün min minatəmizləyən və dağıdılmış infrastruktur obyektlərinin bərpası üçün beş min hərbi inşaatçı göndərmək barədə qərar verib", - "İnterfaks" agentliyi Şoyqudan sitat dərc edib.

Onun sözlərinə görə, əməkdaşlığın davam etdirilməsi və Kursk vilayətinin bərpasında Şimali Koreyanın yardım göstərməsi barədə razılıq əldə olunub.

S.Şoyqu həmçinin əlavə edib ki, "hərbi əməliyyatlarda iştirak edən Koreya Xalq Ordusunun əsgərlərinin şücaətinin əbədiləşdirilməsi" qərara alınıb. Moskva və Pxenyan Ukraynaya qarşı müharibədə həlak olan koreyalı əsgərlərin xatirəsinə abidələr açmaq niyyətindədir.

Bu, Şoyqunun son bir ayda Şimali Koreyaya ikinci səfəridir. "İnterfaks" yazıb ki, iyunun əvvəlində Rusiya Təhlükəsizlik Şurasının katibi və Şimali Koreya lideri ikitərəfli münasibətlərin inkişafını, Ukraynadakı vəziyyəti və 2024-cü il iyunun 19-da Pxenyanda imzalanmış Hərtərəfli Strateji Tərəfdaşlıq Müqaviləsinin müddəalarını müzakirə ediblər.

Rusiya Şimali Koreya hərbçilərinin Ukraynaya qarşı müharibədə iştirakını ilk dəfə bu il aprelin 26-da təsdiqləyib. Rusiya Silahlı Qüvvələrinin Baş Qərargah rəisi Valeri Qerasimov Vladimir Putinə Kursk vilayətindəki vəziyyətlə bağlı hesabat verərkən bildirib ki, "Şimali Koreya hərbçiləri regionun azad edilməsində mühüm yardım göstəriblər".

Aprelin sonunda Cənubi Koreyadan olan deputatlar kəşfiyyat məlumatlarına istinad edərək bildirib ki, Şimali Koreya qoşunlarının Ukraynaya qarşı müharibədə ümumi itkiləri "təxminən 4 min 700 nəfərdir, onlardan da 600-ü həlak olub".

Avropa İttifaqı (Aİ) Şurası və Avropa Parlamenti üçüncü ölkələrlə vizasız səyahət rejiminin dayandırılması ilə bağlı yeni qaydalar üzrə razılığa gəlib. Aİ Şurasının yaydığı açıqlamada bildirilib ki, bu dəyişikliklərlə blok vizasız rejimin sui-istifadə edildiyi və ya onun maraqlarına zidd hallarda daha çevik və təsirli reaksiya vermək imkanına malik olacaq.

Yeni qaydalara əsasən, üçüncü ölkələr üçün vizasız səyahət rejimi təkcə miqrasiya və təhlükəsizlik göstəricilərinə deyil, həm də siyasi və hüquqi amillərə əsasən dayandırıla biləcək. Bura üçüncü ölkənin vizasız rejiminin Aİ-nin viza siyasəti ilə uyğun gəlməməsi; investor vətəndaşlığı (qızıl pasport) proqramlarının fəaliyyəti; hibrid təhdidlər və sənəd təhlükəsizliyi ilə bağlı qanunvericilik və prosedurlarda çatışmazlıqlar; Aİ ilə üçüncü ölkə arasında xarici münasibətlərin pisləşməsi aiddir. (xüsusilə də insan hüquqları və demokratik prinsiplərlə bağlı ciddi gərginliklər müşahidə olunduqda)

Miqrasiya ilə bağlı konkret göstəricilər də müəyyənləşdirilib. Belə ki, bir ölkədən Aİ-yə səfər edən şəxslərin geri qaytarılma, sığınacaqdan imtina və ya qanunsuz qalma hallarında 30 faizlik artım müşahidə olunarsa, vizasız rejim dayandırıla bilər.

Yeni mexanizm vizasız səyahətin müvəqqəti dayandırılması müddətini 9 aydan 12 aya, mümkün uzatma müddətini isə 18 aydan 24 aya qədər artırır. Bu müddətdə Avropa Komissiyası üçüncü ölkə ilə dialoq quraraq vəziyyəti qiymətləndirəcək. Problemlər aradan qaldırılmasa, vizasız rejim tamamilə ləğv oluna bilər.

Hazırda Aİ Şurasına sədrlik edən Polşanın xarici işlər naziri Radoslav Sikorski bu razılaşma ilə bağlı bildirib ki, vizasız səyahət rejimi həm üçüncü ölkə vətəndaşları, həm də Aİ üçün mühüm üstünlüklər təqdim etsə də, sui-istifadə halları ilə üzləşdikdə Aİ vəziyyəti düzəltmək üçün zəruri vasitələrə sahib olmalıdır: "Yeni hüquqi alətlər qanunsuz miqrasiyanın qarşısının alınması və qarşılıqlı əməkdaşlıqdan yayınan ölkələrə təzyiq göstərmək üçün istifadə edilə bilər".

Polşanın baş naziri Donald Tusk Gürcüstan vətəndaşları üçün Avropa İttifaqına (Aİ) vizasız səfər hüququnun ya tamamilə ləğvini və ya məhdudlaşdırılmasını təklif edib.

Parlamentdə çıxışı zamanı D.Tusk bəyan edib ki, gürcülərin üçdə birinin Avropa dəyərlərini bölüşmək istədiyini bilsə də, "müəyyən" standartlara əməl etməyən ölkələrlə vizasız rejimin məhdudlaşdırılmasının tərəfdarıdır.

Bu ilin yanvar-aprel aylarında Azərbaycanda 31 min 462 körpənin doğuşu qeydə alınıb.

Bu barədə Dövlət Statistika Komitəsi məlumat yayıb.

Ötən ilin müvafiq dövrü ilə müqayisədə əhalinin hər 1000 nəfərinə bu göstərici azalaraq 10.0-dan 9.4-ə düşüb. 2024-cü ilin yanvar-aprel aylarında Azərbaycanda 33 min 575 körpə doğulduğu açıqlanmışdı.

Rəsmi məlumatlara görə, Azərbaycanda əhali artımı davam etsə də, son 10 ildə doğum 60 faiz azalıb.

2006-cı ildən Azərbaycanda ünvanlı sosial müavinətlərin verilməsi ilə bağlı 18 yaşa qədər uşaqlar üçün nəzərdə tutulan aylıq müavinətlər ləğv edilib. Müxalifət tez-tez bu müavinətin (uşaqpulu) verilməsinin bərpa olunmasını tələb etsə də, ölkə parlamentindəki çoxluq belə təkliflərə müsbət yanaşmır.